vo nahīñ merā magar us se mohabbat hai to hai <br /><br />ye agar rasmoñ rivājoñ se baġhāvat hai to hai <br /><br />sach ko maiñ ne sach kahā jab kah diyā to kah diyā <br /><br />ab zamāne kī nazar meñ ye himāqat hai to hai <br /><br />kab kahā maiñ ne ki vo mil jaa.e mujh ko maiñ use <br /><br />ġhair nā ho jaa.e vo bas itnī hasrat hai to hai <br /><br />jal gayā parvāna gar to kyā ḳhatā hai sham.a kī <br /><br />raat bhar jalnā jalānā us kī qismat hai to hai <br /><br />dost bin kar dushmanoñ sā vo satātā hai mujhe <br /><br />phir bhī us zālim pe marnā apnī fitrat hai to hai <br /><br />duur the aur duur haiñ har dam zamīn-o-āsmāñ <br /><br />dūriyoñ ke ba.ad bhī donoñ meñ qurbat hai to hai <br />DEEPTI MISHRA
